Duke komentuar iniciativën e Qeverisë që deri në muajin gusht të hartohet projektligji për rregullimin e çmimeve për produktet bazë, Bega theksoi se atë që Qeveria do ta mund ta bënte është ta prekte normën tatimore për produktet esenciale.
“Qeveria para se të kërkojë sakrifica nga bizneset, e udhës do të ishte që së pari të sakrifikojë vetë, duke prekur normën tatimore për produktet esenciale dhe do t’i linte një e drejtë morale. Se nëse Qeveria, ta zëmë, do ta ulte TVSH-në në 0 për vajin apo qumështin që është tash 8%, atëherë do të kishte kuptim moralisht dhe do të ishte e ndershme që tu kërkohej edhe bizneseve për një periudhë të caktuar kohore, ndoshta 2 apo 3 muaj që edhe ata të kufizonin fitimet e tyre për të tejkaluar këtë situatë. Dhe në këtë rast do të kishim 3 palë që po e ndajnë barrën e inflacionit”, tha ai në emisionin “Ditari” në Tëvë 1.
Tutje, Bega potencoi se është e pakuptimtë që derisa Qeveria nuk kufizon të hyrat e veta nga inflacioni, të synojë të kufizojë bizneset.
Sipas raportit të ri të Agjencisë së Statistikave, që nga qershori i vitit të kaluar ngritja e çmimeve është rritur për 14.1%. Përveç çmimeve të larta në produktet esenciale, ngritje ka pasur edhe në derivate. /Teve1.info/
