Kryetari i Partisë Demokratike të Kosovës, Bedri Hamza, ka deklaruar pas takimit me kryeministrin Albin Kurti se nuk ka pasur marrëveshje apo dakordim mes dy liderëve për bashkëpunim institucional.
Hamza ka bërë të ditur se qëndrimi i PDK-së mbetet që kjo parti të jetë në opozitë, duke theksuar se përgjegjësia për krijimin e institucioneve i takon Lëvizjes Vetëvendosje dhe partive të tjera që janë pjesë e diskutimeve.
“Pozicioni i PDK-së është që në këtë mandat të jetë në opozitë. Ne i dëshirojmë sukses z. Kurti dhe të gjitha partive që janë duke biseduar, që t’i japin vendit institucione funksionale”, ka deklaruar Hamza pas takimit.
Ai ka theksuar se PDK-ja do të ketë një rol konstruktiv në Kuvend dhe do të bashkëpunojë me të gjitha partitë politike në çështje që janë në interes të qytetarëve.
“Ne do të bashkëpunojmë me të gjitha forcat politike brenda Kuvendit, në dobi dhe interes të qytetarëve të Kosovës”, është shprehur lideri i PDK-së.
Hamza ka rikujtuar se gjatë fushatës zgjedhore PDK-ja ka garuar me një program të fokusuar në ekonomi, mirëqenie sociale, rritjen e pagave, pensioneve dhe investime në energji e infrastrukturë.
Sipas tij, partia kishte deklaruar më herët se nuk kishte vija të kuqe për bisedime, por pas diskutimeve të zhvilluara, qëndrimi i saj është të vazhdojë punën si opozitë.
“PDK nuk ka vija të kuqe dhe ka qenë e hapur për të biseduar, por pozicioni ynë është që të jemi në opozitë”, ka thënë Hamza.
Ai ka shtuar se në Kuvendin e Kosovës, përveç deputetëve të PDK-së, janë edhe 98 deputetë të tjerë dhe se ekzistojnë mundësi matematikore për formimin e institucioneve.
