Kryetari i Partisë Demokratike të Kosovës (PDK), Bedri Hamza, ka publikuar një videoadresim drejtuar qytetarëve, ku ka theksuar rëndësinë e zgjedhjeve të 28 dhjetorit dhe ka kërkuar mbështetjen e tyre për ta udhëhequr vendin drejt, siç tha ai, stabilitetit dhe zhvillimit.
Hamza u shpreh se vota e qytetarëve në zgjedhjet e fundvitit do të përcaktojë drejtimin e ardhshëm të Kosovës.
“Me 28 dhjetor, vota juaj do ta përcaktojë drejtimin e Kosovës. Një përgjegjësi e rëndësishme, por një mundësi e madhe për ndryshim”, tha ai, duke paraqitur, siç e përshkroi, “dy rrugë të mundshme për vendin”.
“A do ta kemi një qeveri stabile, një qeveri që na bashkon të gjithëve dhe një Kryeministër që u shërben me të vërtetë qytetarëve? Apo do të vazhdojmë me të njëjtin avaz të krizave, përçarjeve e papërgjegjësisë?!” pyeti Hamza në adresim.
Hamza kërkoi mandatin qytetar për të rikthyer stabilitetin në vend.
“Unë e zgjedh të parën, prandaj sot po e kërkoj besimin tuaj. Ma jepni besimin që unë ta rikthej stabilitetin në Kosovë”, deklaroi ai.
Kreu i PDK-së premtoi formimin e një qeverie profesionale dhe të përgjegjëshme.
“Më besoni që unë ta formoj një qeveri me njerëz të aftë dhe të ndershëm. Një qeveri që i mban premtimet dhe që i vendos qytetarët në radhë të parë. Më besoni që unë të udhëheq me transparencë, me përgjegjësi dhe me rezultate”, u shpreh Hamza.
Në videomesazh, Hamza përshkroi gjendjen aktuale në vend si të rënduar.
“Sot, Kosova është e rënduar nga krizat. Jetojmë nën një mjegull pasigurie dhe jostabiliteti. Ndërkohë që shohim çdo ditë se si shpresa tek të rinjtë tanë është zbehur”, tha ai.
Hamza theksoi se ndryshimi është i mundur dhe kërkoi “një shans” nga qytetarët.
“Sot, unë dua t’ju them se nuk ka pse të jetë më kështu. Me 28 dhjetor, ju kërkoj një shans për ta hequr këtë mjegull mbi vendin dhe njerëzit tanë”, theksoi ai.
Në fund, Hamza foli për një perspektivë të re për të ardhmen e vendit.
“Ka një Kosovë ma të mirë përpara nesh. Një Kosovë që është e mundur dhe e arritshme. Një Kosovë stabile. Një Kosovë prosperuese. Me 28 dhjetor, e hapim kapitullin e ri. Le ta zgjedhim unitetin. Le ta zgjedhim stabilitetin. Le ta zgjedhim mirëqenien për Kosovën”, përfundoi ai.
