Bebe Rexha po feston një nga arritjet më të rëndësishme të karrierës së saj. Vetëm pak ditë pas publikimit, albumi i saj i ri “Dirty Blonde” ka pushtuar klasifikimet muzikore në Shtetet e Bashkuara, duke u renditur në vendin e parë të Billboard Top Dance Albums.
Ky është suksesi i parë i artistes shqiptare në krye të kësaj liste, duke shënuar një moment historik në karrierën e saj.
Vetë Billboard i kushtoi një postim të veçantë këngëtares në Instagram, ndërsa Rexha e ripublikoi me krenari në profilin e saj.
“Bebe Rexha është rikthyer në majë. Albumi i saj i katërt në studio, ‘Dirty Blonde’, ka debutuar në vendin e parë në listën Billboard Top Dance Albums, duke shënuar herën e parë që këngëtarja kryeson këtë klasifikim. Projekti, i publikuar në mënyrë të pavarur, ka debutuar gjithashtu në vendin e gjashtë në listën Independent Albums, në vendin e gjashtë në Top Album Sales dhe në pozitën e 43-të në Billboard 200”-shkroi Billboard.
Përveç vendit të parë në kategorinë e albumeve dance, “Dirty Blonde” ka hyrë njëkohësisht në disa prej klasifikimeve më të rëndësishme muzikore në SHBA, duke debutuar në vendin e gjashtë në Independent Albums, në vendin e gjashtë në Top Album Sales dhe në pozitën e 43-të në Billboard 200.
Ky sukses merr edhe më shumë peshë pasi “Dirty Blonde” është albumi i parë që Bebe Rexha publikon si artiste e pavarur.
Vitin e kaluar, ajo i dha fund bashkëpunimit me shtëpinë diskografike Warner Records, duke vendosur të vazhdojë karrierën në mënyrë të pavarur.
“Dirty Blonde” është albumi i katërt në karrierën e këngëtares dhe është pritur shumë mirë nga publiku dhe kritikët.
Me këtë projekt, Bebe Rexha konfirmon edhe një herë pozicionin e saj si një nga artistet shqiptare më të suksesshme në industrinë ndërkombëtare të muzikës.
