Këshilli i Bashkimit Evropian ka emëruar Antero Alfarela Oliveira Lopes si Shef të Misionit të EULEX Kosovës, me një mandat fillestar prej 10 muajsh, i cili nis më 10 gusht 2026.
Lopes do të zëvendësojë në këtë pozitë Giovanni Pietro Barbanon.
Antero Lopes është një zyrtar i lartë portugez me mbi katër dekada përvojë në diplomaci, sundimin e ligjit dhe qeverisjen e sektorit të sigurisë.
Ai ka shërbyer për më shumë se 25 vjet në kuadër të Kombeve të Bashkuara, ku ka pasur angazhime të rëndësishme në misionet ndërkombëtare, përfshirë Forcën Mbrojtëse të OKB-së në Kroaci dhe Bosnje e Hercegovinë (UNPROFOR), si dhe Misionin e Administratës së Përkohshme të OKB-së në Kosovë (UNMIK), ku ka punuar për gjashtë vjet.
Sipas Këshillit të BE-së, përvoja e tij në udhëheqje strategjike, menaxhim të krizave dhe bashkëpunim me qeveritë dhe partnerët ndërkombëtarë pritet të kontribuojë në drejtimin e mëtejshëm të misionit evropian në Kosovë.
“EULEX Kosova, i themeluar në vitin 2008, është misioni më i madh civil i Bashkimit Evropian në kuadër të Politikës së Përbashkët të Sigurisë dhe Mbrojtjes (CSDP). Misioni ka për qëllim të mbështesë institucionet e sundimit të ligjit në Kosovë në forcimin e efektivitetit, qëndrueshmërisë, karakterit shumëetnik dhe llogaridhënies së tyre, në përputhje me standardet ndërkombëtare të të drejtave të njeriut dhe praktikat evropiane”, thuhet në njoftim.
Në mandatin e tij aktual, EULEX-i vazhdon aktivitetet e monitorimit, mentorimit dhe këshillimit për institucionet e sundimit të ligjit në Kosovë, ndërsa ka edhe përgjegjësi të kufizuara ekzekutive përmes Njësisë së Formuar Policore (FPU).
Misioni gjithashtu vazhdon të ofrojë mbështetje për Dhomat e Specializuara dhe Zyrën e Prokurorit të Specializuar, si dhe ndihmë teknike për zbatimin e marrëveshjeve të arritura në kuadër të Dialogut të lehtësuar nga Bashkimi Evropian.
Në qershor të vitit 2025, Këshilli i BE-së zgjati mandatin e EULEX Kosovës për një periudhë të mëtejshme dyvjeçare, deri më 14 qershor 2027./teve1.info./
