Bashkimi Demokratik për Integrim (BDI), e ka quajtur skandaloz incidentin diplomatik në aeroportin e Shkupit, ndaj Presidentes së Republikës së Republikës së Kosovës.
Përmes një komunikate, kanë thënë se duhet dënuar ashpër kjo sjellje ndaj kujtdo, por sidomos ndaj përfaqësuesve më të lartë të shtetit.
“Bashkimi Demokratik për integrim dënon fuqishëm incidentin skandaloz diplomatik në aeroportin e Shkupit ndaj Presidentës së Republikës së Republikës së Kosovës, zonjës Vjosa Osmani.Kjo pasqyrë e shtetit ndaj çdo qytetari, e në veçanti ndaj përfaqësuesve më të lartë të shtetit, e në këtë rast motrat dhe vëllezërit tanë nga Kosova, është e papranueshme dhe duhet dënuar në formën më të ashpër”, thuhet në reagim.
Po ashtu për BDI-në, skandaloze është edhe përfshirja në këtë incident, e shefit të sigurimit të kryetarit të Kuvendit të Maqedonisë së Veriut, Afrim Gashi.
“Involvimi i shefit të sigurimit të Kryetarit jolegjitim të Kuvendit Afrim Gashi në incident, duke e thelluar atë, pa patur asnjë kompetencë, pa qenë të thirrur dhe pa të drejtë, është gjithashtu skandaloz dhe flet zëshëm për gjendjen e mjerueshme dhe vazale në të cilën është përfaqësimi jolegjitim shqiptar në qeverinë monoetnike”, thuhet tutje në reagim.
Fajtor për këtë ngjarje, sipas Bashkimit Demokratik për Integrim, është koalicioni VLEN.
“Humbësit e zgjedhjeve presidenciale dhe parlamentare pranuan rolin e të nënshtruarit dhe servilit, vetëm për të qenë në pushtet për veten e tyre, duke lënë në mëshirën e VMRO DPMNEsë, fatin e shqiptarëve në vend dhe në rajon. Mungesa e legjitimitetit, por edhe e dijës dhe guximit, të bën të turpërohesh para qytetarëve dhe para motrave e vëllezërve në Kosovë e Shqipëri, por edhe në Vashington e Bruksel”, ka shkruar BDI në komunikatë.
Zëvendës ministri i punëve të brendshme, Astrit Iseni, kryetari i Kuvendit të Maqedonisë, Afrim Gashi, sigurimi personal i tij dhe të gjithë të përfshirët e tjerë, sipas BDI-së duhet të japin përgjegjësi politike.
“Mohimi i incidentit nga zëvendës ministri i punëve të brendshme, Astrit Iseni, involvimi i paligjshëm dhe anarkik i sigurimit personal të Gashit që nxiti incident edhe më të madh, nuk guxojnë të kalojnë pa përgjegjësi politike bashkë me përgjegjësinë ligjore të të gjithë të involvuarve në këtë skandal diplomatik”, theksohet në komunikatë./teve1.info
