Amerikania e Bashkimit, Caterrion Thompson është shpallur “MVP” i xhiros së tretë në Superligë, ka njoftuar Federata e Basketbollit të Kosovës (FBK), të hënën.
Thompson ishte ndër më të dalluarat në fitoren e Bashkimit ndaj Junior 06, duke e mbyllur ndeshjen me 28 pikë, 3 kërcime e 4 asistime.
Po ashtu, Thompson ka zënë vend edhe në pesëshen më të mirë, pjesë e së cilës është edhe bashkëlojtarja e saj, Aulona Muhadri që realizoi 11 pikë, 11 kërcime e 7 asistime.
Dy basketbolliste të Prishtinës, gjithashtu janë përfshirë në pesëshen më të mirë pas fitores në udhëtim te Peja 03.
Aliaina Rice që pati 23 pikë, 16 kërcime e 3 asistime si dhe Malvina Haziri që kontribuoi me 17 pikë, 4 kërcime e 3 asistime.
Vend në pesëshe ka zënë edhe Saranda Daci e Penzës, e cila realizoi 28 pikë, 8 kërcime e 7 asistime në triumfin ndaj Trepçës.
