Kombëtarja e Kosovës në basketboll, e nis raundin e parë parakualifikues për “Eurobasket 2029” kundër Shqipërisë.
Kosova e Shqipëria, janë pjesë e Grupit C, të cilin e përbën edhe Kombëtarja e Sllovakisë.
“Dardanët” kampanjën e nisin kundër “Kuqezinjëve” me ndeshjen e parë që luhet në Shqipëri, më datën 30 nëntor.
Tri ditë para duelit me Kosovën, Shqipëria luan në udhëtim kundër Sllovakisë.
Në nëntor, Kosova e ka vetëm një ndeshje për të vazhduar me përballjet tjera në shkurt dhe korrik të vitit të ardhshëm.
Më 27 shkurt, Kosova e pret Sllovakinë, e cila pastaj përballet në udhëtim në Shqipëri më datën 2 mars.
Ndeshja e kthimit mes Kosovës dhe Shqipërisë do të luhet më datën 2 korrik, përpara se “Dardanët” ta mbyllin raundin e parë kualifikues me duelin në udhëtim ndaj Sllovakisë tri ditë më vonë.
