Pas humbjes së ngushtë në ndeshjen hapëse të FIBA Kampionatit Evropian për Shtetet e Vogla, basketbollistet e Kosovës synojnë fitoren në përballjen e dytë të kësaj gare.
Kjo ngjarje që nisi të martën po mbahet në Prishtinë për herë të parë dhe atë nën organizimin e Federatës së Basketbollit të Kosovës. Kombëtarja e Kosovës, të martën mbrëma e humbi ndeshjen e parë në kuadër të fazës së grupeve.
U mposht nga Malta me shifrat 72:65 përkundër paraqitjes së mirë dhe angazhimit të madh në parket. Duelin e dytë në kuadër të Grupit A, të cilin e përbën edhe Gjeorgjia, Kosova do ta ketë me Qipron. Qipro ndeshjen e parë e ka fituar ndaj Gjeorgjisë 89:57, kurse me Kosovën do të përballet sonte prej orës 20:30 në kryeqytet.
Dy skuadrat e para të Grupit A, avancojnë në “Final Four”, pjesë e së cilës do të jenë edhe dy të parat e Grupit B që përbëhet nga Shqipëria, Norvegjia, Armenia e Andorra.
Për Kosovën, kjo është hera e tretë që paraqitet në këtë garë që në të dyja rastet është mbajtur në Qipro.
