Në basketbollin kosovar nuk ka pushim, pasi menjëherë këtë mesjavë do të zhvillohen ndeshjet e para gjysmëfinale të Kupës së Kosovës.
Të mërkurën, do të zhvillohen dy ndeshjet e kësaj faze dhe të dyja në orarin e njëjtë, prej orës 18:45.
Do të jenë përballje interesante, me katër skuadrat që synojnë të krijojnë avantazhin pas ndeshjeve të para për shkak se edhe në fazën gjysmëfinale, fituesi do të përcaktohet pas dy dueleve, ku skuadra me rezultatin më të mirë avancon në finale të Kupës.
Në palestrën “Sezai Surroi” në Prizren, Bashkimi – Sigal Prishtina është ndeshja e së mërkurës, ndërsa ditën e njëjtë por në palestrën “Minatori” në Mitrovicë do të jetë dueli ndërmjet Trepçës dhe Borës.
Trepça është fituese në fuqi e Kupës së Kosovës, pasi sezonin e shkuar në ndeshjen finale triumfoi ndaj skuadrës së Bashkimit me shifrat 85:79.
