Sokol Bashota tha vendimi për sulmin që kishte ndodhur në Rahovec në korrik të 1998-ës është marrë nga njësitet lokale atje dhe jo nga Shtabi i Përgjithshëm.
Ai të martën në Hagë, në cilësi të dëshmitarit, ka thënë që nuk kishte diskutim në Shtabin e Përgjithshëm lidhur me këtë çështje përpara se të ndodhte ajo, raporton “Betimi për Drejtësi“.
“Ka qenë një gabim shumë i madh hyrja e atij grupi, por këtë s’kemi mujt me e kontrollu ne. (Pasojën) E kemi parandje për arsye se nuk kemi qenë të përgatitur për me hy në një vend me sulmu ku ka civilë duke banuar aty për shkak të shkallës së rrezikshmërisë së qytetarëve, ne nuk kemi guxuar të marrim një vendim të tillë në vendet urbane. Ky ka qenë gabimi që ata janë futur. Pastaj i ka sjellë pasojat e veta më vonë. Kemi pas humbje të mëdha aty dhe thjesht ka qenë një ç’akordim i vet ushtarëve në atë pjesë”, tha Bashota.
Bashota pohoi se rastet si këto kanë dikuar që të vijë Bislim Zyrapi dhe oficerët e tjerë të karrierës që t’i japin kuptim organizimit të UÇK-së dhe ka filluar strukturimi i saj nga njësitet më të vogla e deri tek Shtabi i Përgjithshëm.
Ai tha se edhe pas strukturimit kanë pasur probleme pasi janë përballë me situata të ndryshme, por që vazhdimisht janë angazhuar në këtë drejtim. Gjithashtu shtoi se nuk e di nëse Rexhep Selimi, Hashim Thaçi apo Kadri Veseli kanë shkuar në Rahovec pas sulmit atje.
Në fund të shtatorit 1998 kur ndodhën negociatat me FARK-un, dëshmitari tha se është njoftuar nga Bislim Zyrapi që është arritur një marrëveshje që oficerët e kësaj strukture të hynë nën ombrellën e UÇK-së.
Dëshmitari deklaroi se më ’97-ën ka qenë Shtabi Qendror dhe nuk ka pasur Shtab të Përgjithshëm. Pohoi se ka thënë që nuk ka qenë Shtab i mirëfilltë, por një grup shokësh që dëshironin ta konsolidonin qëllimin e tyre. Gjithashtu, ai tha se nuk ka qenë Kadri Veseli pjesë e atij grupi.
Ndërsa, nuk u dëgjua përgjigja e tij kur u pyet nëse Veseli ka marrë pjesë në ndonjë mbledhje të LPK-së në Zvicër.
Ndërsa, sa i takon drejtorive të UÇK-së, Bashota pohoi se hapat e parë në krijimin e tyre janë marrë në nëntor të ’98-ës.
Para kësaj periudhe, Bashota tha se aty ku ka pasur zona të formuara, ajo pjesë është udhëhequr nga komandantët e tyre.
“Ne si grup nuk kemi mujt sepse ne nuk kemi mujt me u identifiku para tyre”, tha Bashota duke folur për veten dhe personat e tjerë që u bënë pjesë e Shtabit të Përgjithshëm.
Avokati i Veselit, Rodney Dixon u fokusua tek deklarata e dëshmitarit ku kishte thënë se Bislim Zyrapi shkoi në disa zona të UÇK-së për të pasur takime me udhëheqësit e tyre.
Bashota tha se Zyrapi nuk i raportoi atij personalisht dhe tha se nuk e di nëse i ka raportuar ndokujt nga Shtabi i Përgjithshëm.
“Nuk e di dhe nuk e di nëse ka pas nevojë për arsye se ende nuk ka qenë Shtabi i formuar në atë kohë. Por, ai kryesisht ka punu me komandantë të zonave, me pika që janë quajt atëherë të grumbulluara të ushtarëve që kanë qenë në zona të ndryshme, kryesisht me ta. Ka marrë evidenca si në armatim, si në numër të ushtarëve. Ka marrë evidenca edhe për emërime që janë ba nëpër zona e këto. Pastaj, në fund në nëntor i ka paraqit të gjitha”, tha Bashota.
Ai tha se mund të jetë që gjatë kësaj kohe të jetë takuar njëherë apo dy me Zyrapin, për arsye se ky i fundit ka lëvizë në tërë territorin e Kosovës ku ka pasur ushtarë të grumbulluar të UÇK-së.
“Mundësia e tij për t’i raportuar dikujt ka qenë shumë e vogël”, tha Bashota tutje.
Më herët, dëshmitari kishte thënë se në periudhën korrik-gusht të 1998-ës kishte shkuar disa herë Kadri Veseli në Shqipëri.
Nuk u dëgjua përgjigja e dëshmitarit kur u pyet se a autorizohej për të shkuar në Shqipëri apo e bënte vetë këtë udhëtim.
“Nuk e di, por e di që sa herë ka ardhë në Kosovë, ka sjellë armatim por naj detyrë specifike të tij nuk e di”, shtoi ai.
Dëshmitari tha se është e vërtetë që shumë persona në atë kohë kalonin kufirin dhe sillnin armë në Kosovë në mënyrë që të përforcoheshin.
