Skuadra e Bashkimit nga Prizreni sonte do të zhvillojë ndeshjen e radhës në arenën ndërkombëtare, në kuadër të xhiros së katërt të fazës së grupeve në FIBA Europe Cup.
Përballë saj do të jetë skuadra italiane Reggiana, një kundërshtar me traditë në basketbollin evropian.
Pas katër ndeshjeve të zhvilluara deri më tani, Bashkimi ka regjistruar një fitore dhe tri humbje, ndërsa Reggiana ka dy fitore dhe dy humbje, çka e bën këtë përballje shumë të rëndësishme për ecurinë e grupit.
Në takimin e parë mes këtyre skuadrave, i cili u zhvillua në Itali, prizrenasit u mposhtën me rezultatin 100:65.
Ndeshja do të luhet në palestrën “Sezai Surroi”, me fillim nga ora 19:00, ndërsa tifozët mund ta ndjekin drejtpërdrejt në kanalet e platformës “Telkos”.
Për Bashkimin, ky takim ka rëndësi të veçantë, pasi një fitore do ta mbante gjallë shpresën për kualifikim në fazën tjetër të garës, ndërsa një tjetër humbje do ta komplikonte ndjeshëm situatën në grup.
Krahas Bashkimit, në këtë edicion të FIBA Europe Cup po merr pjesë edhe Trepça, e cila sonte nga ora 18:30 po zhvillon ndeshjen e saj në udhëtim kundër Braunschweig në Gjermani.
