Skuadra e Bashkimit ka nisur përgatitjet për sezonin e ri në Superligën e Kosovës në basketboll.
Pasi kanë kryer testet fizike dhe kontrollimet mjekësore, basketbollistët e ekipit nga Prizreni kanë filluar më fazën përgatitore nën urdhrat e trajnerit Darko Raduloviq.
Bashkimi, bëhet ekipi i parë i elitës së basketbollit kosovar që ka nisur me fazën përgatitore dhe prizrenasit synojnë që të jenë sa më të përgatitur për sezonin e ri që nis në muajin shtator.
Të gjithë lojtarët, të huaj dhe vendor kanë dalë në stërvitje kurse Bashkimi gjatë kësaj vere ishte ndër klubet më aktive sa i përket përforcimeve.
Krahas lojtarëve vendor, Bashkimi ka angazhuar edhe pesë lojtarë të huaj pasi synimet për sezonin e ri i ka të mëdha.
Amerikanët Maliek White, Mack Smith, MJ Rhet si dhe kroati Robert Rikiq do ta bartin fanellën portokall e zit ë Bashkimit, ndërsa vendorët si Meriton Ismaili, Valon Bunjaku, Lejson Zeqiri, Altin Morina e Samir Zekiqi janë forcë shtesë për ekipin nga Prizreni.
Bashkimi herën e fundit e ka fituar titullin e kampionit të Kosovës në vitin 2018, ndërsa fitues i Kupës ishte në vitin 2001.
