Bashkimi e ka fituar bindshëm edhe ndeshjen kthyese të gjysmëfinales së Kupës së Kosovës në basketboll. Pas fitores 83:67 në “Sezai Surroi” në Prizren në ndeshjen e parë, prizrenasit fituan 85:69 në ndeshjen kthyese që u luajt në palestrën “1 Tetori” në Prishtinë.
Me këtë fitore, Bashkimi i bashkohet Trepçës në finalen që do të luhet më 18 shkurt.
Këto dy skuadra në finale luajtën edhe në shkurt të vitit të kaluar, kur Trepça e fitoi për të katërt herë rresht trofeun e Kupës.
Rezultati pas pjesës së parë ishte 40:36 në të mirë të Bashkimit. Epërsia shkoi duke u thelluar në periudhën e tretë e të katërt.
Lejson Zeqiri me 11 pikë, shtatë kërcime e pesë asistime, i kishte statistikat më të mira te Bashkimi, kurse Adrio Bailey ishte më i dalluari te Sigal Prishtina me 27 pikë, nëntë kërcime e dy asistime.
Bashkimi pritet të luftojë me Trepçën edhe për titull kampioni. Trepça është e para në Superligë, ndërsa Bashkimi i dyti.
