Xavi Hernandez e nisi me ndryshime në formacion ndeshjen me Villarrealin në “Camp Nou” (3-0), duke aktivizuar nga minuta e parë Ansu Fatin dhe Ferran Torresin në mbështetje të Lewandowskit. Ishte pikërisht sulmuesi polak që jo vetëm zhbllokoi takimin ndaj “Nëndetëses së Verdhë”, por realizoi edhe të dytin pa u mbushur katër minuta nga festa e të parit.
Në të 31-tën, sulmuesi polak shndërroi në gol asistin e Jordi Albas, ndërsa në të 35-tën e tundi rrjetën me një goditje të kalibruar nga jashtë zonës.
Vetëm pak çaste më vonë Ansu Fati shënon të tretin.
Rezultati i thellë i pjesës së parë e kushtëzoi disi lojën e Barcelonës, që më shumë se për të shënuar mendoi të kishte nën kontroll ndeshjen. Xavi Hernandez gjatë rreth 25 minuta para përfundimit kreu pesë zëvendësime të njëpasnjëshme, praktikisht duke ndërruar gjysmën e ekipit, për të ruajtur freskinë fizike. Me këtë sukses Barcelona rikthen diferencën prej tri pikësh me Realin kryesues.
