Skuadra e Barcelonës e ka nisur vitin 2026 në mënyrën më të mirë të mundshme, triumfin në Superkupën e Spanjës.
Në finalen e luajtur të dielën mbrëma në Jeddah të Arabisë Saudite, Barcelona fitoi me rezultatin e ngushtë 3:2 ndaj Real Madridit.
Për Barcelonën, ky është trofeu i parë i këtij viti dhe fitorja e parë në “El Clasicon” e vitit 2026.
Ndeshja e luajtur në Arabinë Saudite ishte tejet e fortë dhe interesante, me një fjalë spektakël i vërtetë nga të dyja skuadrat në fushë.
Megjithatë, pjesa e parë ishte dukshëm më dinamike sesa e dyta, në të cilën u shënua vetëm një gol.
Në pjesën e parë, u shënuan gjithsej katër gola, dy realizoi Barcelona dhe dy të tjerë Real Madridi.
Në fakt, Barcelona dy herë kaloi në epërsi gjatë pjesës së parë, por Real Madridi reagoi duke barazuar rezultatin në të dyja rastet.
Madje, tre prej katër golave u shënuan në gjashtë minutat shtesë të pjesës së parë.
Rezultati u zhbllokua në minutën e 36-të nga Raphinha (1:0), përpara se Vinicius Junior të barazoi shifrat (1:1) me supergol në minutën e dytë të kohës shtesë.
Në minutën e katërt të kohës shtesë, Robert Lewandowski riktheu epërsinë e Barcelonës (2:1), përpara se Gonzalo Garcia dy minuta më vonë të barazojë dhe skuadrat të shkojnë në pushim me shifrat 2:2.
Golin e fitores, që edhe ia siguroi Barcelonës triumfin në Superkupë, e realizoi braziliani Raphinha në minutën e 73-të pas asistimit të Dani Olmos.
Në minutën e 90-të, Barcelona mbeti me një lojtar më pak pasi u përjashtua kapiteni Frenkie De Jong. Te Real Madridi në 15-të minutat e fundit të ndeshjes u inkuadrua Kylian Mbappe që zëvendësoi Garcian.
