Dogana e Kosovës ka njoftuar se në pikën kufitare në Vërmicë, ka sekuestruar mallra të padeklaruara me një vlerë të përafërt prej 1 mijë e 500 eurosh.
Në njoftimin zyrtar bëhet e ditur se, mallrat janë gjetur në një automjet me targa të huaja gjatë një kontrolli rutinë.
“Gjatë procedurës së rregullt, drejtuesi i automjetit është pyetur nëse kishte mallra për të deklaruar, por ai ka deklaruar se nuk posedonte asgjë për deklarim. Bazuar në analizën e riskut dhe në bashkëpunim me zyrtarët policorë, automjeti është dërguar për kontroll të detajuar në vijën e dytë”, thuhet në njoftim.
Personi përgjegjës, një shtetas i huaj, është proceduar në përputhje me ligjin, ndërsa ndaj rastit janë ndërmarrë të gjitha veprimet ligjore të nevojshme.
“Dogana e Kosovës mbetet e përkushtuar në zbatimin e ligjit dhe në luftimin e dukurive të kundërligjshme, duke siguruar trajtim të barabartë për të gjithë dhe mbrojtje të ekonomisë së vendit”, theksohet në fund të njoftimit./teve1.info/
