Vetëm një pjesë e Shipitullës, fshatit të Shemsi Mjekut, shfrytëzohet nga KEK-u për nevoja xehetare pas shpronësimit.
Por, Mjeku me bashkëfshatarët e tjerë po kërkojnë që të shpronësohet i gjithë fshati në Komunën e Obiliqit.
Pasi siç thotë ai, nuk ka jetë më për banorët e këtushëm në siç thonë ata, zhurmën dhe pluhurin e madh.
Rruga është marrë, ambullanta nuk punon, shkolla, është zhurmë e madhe, na kanë shpronësu tokat deri këtu kanë ardhë na kanë mbet ka dy tre ari vetëm truall. Duhet me shku gjithqysh me bo një protestë nKEK, përpara qeverisë e krejt institucioneve”, ka thënë ai.
Të njëjtin hall e ka edhe Fatmir Mjekiqi.
Ky madje ka edhe një shqetësim tjetër lidhur me shpronësimet.
“Ne kemi probleme me KEK prej vitit 2004, fillimisht e kanë ndalë ndërtimin për arsye mos me ju rrit kostoja e ndërtimit për arsye se është shpallë zonë me interes të veçantë dhe ky fshat ka pas me u zhvendos në tërësi. Por në vitin 2024 ka ndodh diçka e çuditshme, na i kanë marrë pronat 95 për qind. I kanë lanë 3 për qind janë oborre që i kanë mbet banorëve.Na i kanë izolu totalisht.
Vitin 2020 e kanë marrë deri në gjysmë, e kanë pagu vetëm tokën, objektet si kanë kompensu, tokën e kanë kompensu. Çdo shtëpi është e qarë e kristë”, shprehet ai.
Andaj që të gjithë u nisën drejt Prishtinës për tek zyret e KEK-ut për të protestuar.
Me te arritur këtu banorët kërkuan që të futeshin brenda për të biseduar me me bordin e KEK-ut lidhur me shpronësimet e tokave.
Por nuk u lejuan të futeshin brenda.
Banorët sërish kërkuan që dikush nga bordi të flet me ta.
Pas mosrealizimit të kërkesës për një takim me bordin e KEK-ut, protestuesit kanë vazhduar tek Ministria e Ekonomisë, pasi edhe në këtë institucion e kanë dërguar kërkesën e njëjtë për takim.
Protestuesit kanë qëndruar para dyerve të ministrisë duke pritur një takim me ministren e Ekonomisë, Artane Rizvanolli.
Por as kjo e fundit nuk doli të takohej me ta.
Ndërsa pasdite Korporata Energjetike e Kosovës pas protestës së banorëve të fshatit Shipitullë të Komunës së Obiliqit ka dalë me njoftim lidhur me shpronësimet e tokave.
Përvetësimi i tokës për nevoja xehetare (përmes Zhvendosjes/Shpronësimit) nga KEK bëhet vetëm bazuar në Planin Kryesor Xehetar dhe në legjislacionin në fuqi, përfshirë Kornizën e Politikave të Zhvendosjes (KPZH), Ligjin për Shpronësimin e Pronës së Paluajtshme në Kosovë dhe Ligjin për Miniera dhe Minerale (LMM)”, thuhet nga KEK.
Tutje, kjo korporatë ka thënë që sa i përket shqetësimeve të banorëve në lidhje me procesin e shpronësimeve, KEK për hire të transparencës të gjitha i ka adresuar tek organet relevante të drejtësisë.
