Sulmuesi i Ballkanit, Valentin Serebe ishte shumë afër largimit nga Kosova, por kërkesa e lartë e skuadrës nga Suhareka për kartonin e tij, ka bërë që Levski të tërhiqet prapa.
Mediumet në Bullgari, kanë raportuar të mërkurën se Levski ishte në negociata me Ballkanin për transferimin e Serebes, i cili ishte kërkesë e trajnerit Julio Velasquez por marrëveshja mes klubeve nuk u arrit.
Thuhet se për kartonin e sulmuesit 23-vjeçar, Ballkani kërkoi 600 mijë euro, shumë kjo që është konsideruar e lartë nga skuadra bullgare.
Serebe ka treguar një formë fantastike në stinorin vjeshtor të Superligës së Kosovës, ku në 16 ndeshje të luajtura në kampionat ka shënuar 13 gola dhe ka bërë 2 asistime.
Ai i prinë listës së golashënuesve të elitës së futbollit kosovar, ndërsa me skuadrën e Ballkanit, Serebe ka kontratë deri në verën e vitit 2028.
