Skuadra e Ballkanit i është afruar edhe më shumë mbrojtjes së titullit të kampionit në Superligën e Kosovës në futboll.
Kampioni në fuqi, më lehtësi ka triumfuar në Suharekë ndaj Fushë Kosovës me rezultatin 3:0 të dielën në kuadër të xhiros së 34-të.
Walid Hamidi (32’), Almir Kryeziu (52’) dhe Bernard Karrica (88’) shënuan golat për fitoren e Ballkanit, i cili mbetet në krye të tabelës me 72 pikë të mbledhura kur kanë mbetur edhe dy xhiro deri në fund të këtij edicioni.
Katër pikë më pak se Ballkani i ka skuadra e Llapit që në stadiumin “Zahir Pajaziti” në Podujevë e mposhti skuadrën e Malishevës 1:0, falë golit të shënuar nga sulmuesi Ahmed Januzi (37’).
Ndërkohë, Drita është përshëndetur nga gara për titullin e kampionit pasi luajti pa gola në shtëpi kundër Feronikelit ’74 dhe tani ka gjashtë pikë më pak se Ballkani që është lider.
Fitore të rëndësishme në këtë xhiro ka shënuar edhe Dukagjini që triumfoi 1:0 ndaj Prishtinës, ndërsa golin e vetëm në këtë përballje e realizoi Redon Syla (58’). Me këtë fitore, Dukagjini e siguron mbetjen në elitën e futbollit kosovar edhe për edicionin e ardhshëm.
Gara për t’i ikur barazhit do të vazhdoj deri në fund mes Gjilanit dhe Feronikelit ’74. Gjilani fitoi 3:0 në udhëtim te Liria e Prizrenit dhe zë vendin e 7-të me 39 pikë, një më shumë se Feronikeli ’74 që është i teti, pozitë kjo që dërgon në barazh. Senad Jaroviq (29’) dhe Kushtrim Shabani (46’, 57’) realizuan për fitoren e Gjilanit.
Xhiroja e ardhshme do të jetë vendimtare si në garën për titullin e kampionit ashtu edhe në atë për t’u larguar nga zona e barazhit.
Llapi e pret Ballkanin në shtëpi në xhiron e parafundit në një ndeshje që pritet të jetë tejet interesante dhe mund t’i jap fund dilemave për kampion. Ballkani po synon titullin e tretë rresht në histori të klubit, ndërsa Llapi të parin.
Ndërkohë, sa i përket zonës së barazhit, Feronikeli ’74 e pret në shtëpi Dukagjinin kurse Gjilani është mysafir i Dritës. Të gjitha ndeshjet e kësaj xhiroje luhen të shtunën dhe nisin në orën 17:00.
