Kampioni në fuqi, Ballkani e ka fituar derbin e qytetit dhe atë të xhiros së nëntë të Superligës së Kosovës në futboll ndaj Suharekës.
Ndeshja e luajtur të dielën në Suharekë, ka përfunduar me fitoren minimale të Ballkanit 1:0.
Golin e vetëm në këtë ndeshje, e realizoi Bleart Tolaj.
Tolaj shënoi nga afërsia në minutën e tretë pas asistimit të brazilianite Giovanni Ribeiro.
Me këtë fitore, Ballkani ngrihet në kuotën e 17 pikëve sa i ka edhe Malisheva, ndërsa Suhareka që regjistroi humbjen e tretë rresht ka 13 pikë.
Te Suhareka në derbin kundër Ballkanit, debutoi trajneri Qëndrim Kida që në këtë post zëvendësoi Shpëtim Duron e larguar.
Ndërkohë, të dielën 1:0 ka fituar edhe Dukagjini që mposhti skuadrën e Llapit në Klinë.
Hekuran Berisha në minutën e 58-të, shënoi golin e vetëm në këtë përballje pas asistimit të Altin Merlakut.
Për ekipin e trajnerit Ismet Munishi, kjo është fitorja e parë pas katër humbjeve rresht dhe tani ka tubuar 9 pikë sa i ka edhe Gjilani.
Në anën tjetër, Llapi regjistron humbjen e parë pas katër ndeshjeve pa disfatë dhe mbetet në kuotën e 14 pikëve.
