Ballkani e Prishtina, janë skuadrat kosovare që do të paraqiten në raundin e dytë kualifikues të Ligës së Konferencës.
Mirëpo, tashmë dihen edhe kundërshtarët e mundshëm të dy skuadrave të Superligës, nëse kualifikohen në raundin e tretë.
Shorti për raundin e tretë kualifikues të kësaj gare, është tërhequr të hënën kurse si Ballkani ashtu edhe Prishtina synojnë të paraqiten në këtë rreth.
Ballkani garat evropiane këtë sezon i nis nga raundi i dytë kualifikues, në të cilin përballet me Florianan e Maltës, me ndeshjen e parë që do të luhet të martën mbrëma në Prishtinë.
Ndërkohë, Prishtina që u eliminua në raundin e parë kualifikues të Ligës së Evropës nga Sheriff Tiraspoli, do të luaj në raundin e dytë kualifikues të Ligës së Konferencës ku do të përballet me Larnen e Irlandës së Veriut.
Në rast se Ballkani e Prishtina, avancojnë tutje, atëherë në raundin e tretë do të përballen me fituesin e ndeshjeve St. Joseph’s – Shamrock Rovers, përkatësisht Varazhdin – Santa Clara.
