Tekniku nga Kroacia, Mislav Karoglan është trajner i ri i Ballkanit.
Ballkani, të martën mbrëma ka zyrtarizuar kroatin Karoglan, i cili në këtë post ka zëvendësuar Orges Shehin.
Karoglan është trajneri i parë i huaj te Ballkani, ekip me të cilin ma firmosur kontratë për dy vjet e gjysmë.
“FC Balkani zyrtarisht ka emëruar kroatin Mislav Karoglan si trajnerin e ri të skuadrës, duke shënuar kështu një moment historik për klubin tonë, me kroatin që është trajneri parë i huaj që drejton FC Ballkanin”, ka shkruar Ballkani.
Karoglan, 43 vjeç, vjen në Suharekë me një eksperiencë të pasur në futbollin evropian. Ai ishte kryetrajner i klubit të njohur kroat Hajduku i Splitit në dy raste, së fundmi sezonin 2023–24, ndërsa edicionin e kaluar 2024–25 ka drejtuar kampionin e shumëfishtë moldav Sheriff Tiraspol, me të cilin ka garuar edhe në arenën ndërkombëtare.
Përpara këtyre angazhimeve, ai ka udhëhequr edhe skuadra të tjera nga elita e futbollit kroat, si Zadar dhe Istra 1961, duke ndërtuar një profil të fortë si trajner modern.
“Trajnerit Karoglan i urojmë mirëseardhje dhe shumë fat e suksese në krye të ekipit tonë, duke besuar se puna e tij do të sjellë energji të re dhe rezultate pozitive për FC Ballkanin”, ka mbyllur Ballkani njoftimin.
