Anëtari i Lëvizja Vetëvendosje, Alban Bajrami, ka komentuar zhvillimet politike në vend pas dështimit për zgjedhjen e presidentit dhe shkuarjes në zgjedhje të reja.
Në emisionin “Info Nata” në Tëvë1, ai fajësoi opozitën për situatën e krijuar, duke thënë se ajo nuk ka guxuar të dalë me kandidat.
“Kjo është një situatë për shkak të pezmit të madh që opozita e ka për shkak të fitores tonë që e kemi realizuar më 28 dhjetor. Edhe unë, nëse nuk gaboj, kam thënë që këta nuk kanë me dalë me një kandidat, sepse nuk guxojnë me dalë me një kandidat, për shkak se janë frikësuar që ne do t’ia votojmë kandidatin e parë që e qesin. Unë nuk besoj që kishin arritur me qit ndonjë kandidat – sido që të ishte, nëse opozita do të bëhej bashkë dhe do të propozonte një emër, kanë pasur frikë që ne do t’ia votojmë. Kjo nuk ka të bëjë me çështjen e presidentit, kjo ka të bëjë me faktin që Kurti është kryeministër dhe ata dëshirojnë me largu prej pushteti Albin Kurtin”, ka thënë Bajrami.
Ai shtoi se, sipas tij, kishte oferta konkrete për marrëveshje politike me Lidhja Demokratike e Kosovës, por që nuk u pranuan.
“Unë e kam dëgjuar këtë ‘marrëveshjen politike’, president konsensual, marrëveshje klasike – unë nuk e di a mundet dikush me dalë me shpjegu çka ka qenë nënkuptimi i kësaj. Ne LDK-së i kemi propozuar zëvendëskryeministrin e parë dhe katër ministri. Nuk mundem me i dhënë 10 ministri, sepse ata nuk i kanë as 15 për qind, i kanë rreth 13 për qind. Nuk mund ta ofendojmë vullnetin e popullit – çka nuk ta jep populli, nuk mund t’ua japim ne. I kemi ofruar mundësinë për të qenë pjesë e qeverisë, edhe kryeparlamentarin, por na thoshin jo, sepse mendonin që ne do t’i shkarkonim”, është shprehur ai.
Bajrami foli edhe për pretendimet e LDK-së lidhur me shkarkimet, duke përmendur rastin e Agim Veliu.
“Ata ankoheshin që ne mund t’ua shkarkonim ministrat, duke u bazuar në një rast si ai i Agim Veliut. Por për me shkarku kryeparlamentarin duhen 61 vota, e për disa procese edhe 2/3 – që i bie që ata vetë do të duhej të vinin dhe ta shkarkonin veten. Ne nuk mund t’ua ndalim halucinacionet që i kanë për vetveten. Ankoheshin edhe për shkarkime, por harrojnë që vetë Lumir Abdixhiku është pajtuar me Albin Kurtin për me e shkarku Agim Veliun, ia ka mbajt krahun në atë kohë”, ka deklaruar Bajrami.
