Deputetja e Lidhjes Demokratike të Kosovës, Hykmete Bajrami, ka deklaruar se LDK do të marrë pjesë në takimin e thirrur për nesër nga Lëvizja Vetëvendosje, megjithëse nuk sheh ndonjë pritshmëri të lartë për ndonjë marrëveshje konkrete.
Ajo ka kritikuar qasjen e kryeministrit në detyrë, Albin Kurti, duke theksuar se ai nuk mori pjesë në një takim të mëparshëm me liderët e partive, pavarësisht që ndodhej në të njëjtën ndërtesë.
“LDK-ja do të marrë pjesë nesër në takim, pavarësisht mungesës së bashkëpunimit nga ana e LVV-së, të cilin ju e patë dhe ishit dëshmitarë që vetëm para 5 minutash zoti Kurti nuk e mori mundin prej sallës plenare deri te salla e takimit numër 10, ku ishin prezent të gjithë liderët e partive politike,” tha Bajrami.
Ajo shtoi se nuk ka shumë pritje nga ky takim, duke përmendur historikun e sjelljes së Vetëvendosjes dhe duke e cilësuar ngjarjen më shumë si një veprim mediatik.
“Nga ky takim nuk është se kemi shumë pritje, duke marrë parasysh komplet të kaluarën historike të Vetëvendosjes dhe krejt sjelljen e tyre. Konferencën e sotme për media nuk është se mund ta shohim si hap për zgjidhje – është më shumë për ‘show’ mediatik. Megjithatë, për të treguar që jemi për konstituimin e institucioneve, sot jemi prezent,” përfundoi Bajrami
