Profesori i së Drejtës Kushtetuese, Arsim Bajrami tha se Kosova duhet të krijojë mekanizma ligjor, gjyqësor dhe kushtetues për kontrollin e plotë të Asociacionit.
Bajrami mendon se duhet të krijohen dy nivele të kontrollit që ky Asociacion asnjëherë të mos tentojë të dalë nga kuadri ligjor i Kosovës.
“E para një kontroll administrativ shtetëror, qeveritar që bëhet përmes Ministrisë së Pushtetit Lokal, përmes Qeverisë, përmes inspektimin administrativ dhe e dyta kontrolli gjyqësor përmes Gjykatës Kushtetuese duke ia dhënë një kompetencë shtesë Gjykatës Kushtetuese që të anulojë dhe të shfuqizojë çfarëdo akti të këtij Asociacioni, i cili bie ndesh me Kushtetutën e Kosovës dhe legjislacionin e Kosovës”, kështu ka deklaruar Bajrami në emisionin “Respublika” në Tëvë 1.
Sipas Bajramit, Kosova është një shoqëri shumë etnike, nuk është shtet shumë etnik, madje ai thotë se ka dallime konceptuale midis termit shtet shumë etnik dhe shoqëri shumë etnike.
“Kemi qenë shumë të kujdesshëm kur e kemi shkruar kushtetutën, sepse po ta futshim në kushtetutë serbe si komb shtetformues dhe ta deklaronim Kosovën si shtet shumë etnik atëherë serbët do ishin pronarë-aksionarë të shtetit. Ne jemi shoqëri shumë etnike”, tha Bajrami.
Tutje ai ka deklaruar se kryeministri, Albin Kurti le të provon, sepse Qeveria do ta dekretojë Asociacionin pa marrë parasysh ekipin menaxhues.
“Qeveria duhet ta bjerë një dekret që është akt ligjor me të cilën e formon Bashkësinë e Komunave me Shumicë Serbe dhe ajo atëherë le të ia ndërroj emrin në qoftë se e ka mundësinë e plotë, le të procedojë… është me rendësi që mos me deklaru që nuk e përmbushim një detyrim ndërkombëtarë, nëse nuk e përmbush procedo me çfarëdo shfuqizim të marrëveshjes. Pra një marrëveshje ndërkombëtare momentin kur nënshkruhet ka një sipërmarrësi në raport me ligjet në hierarkinë juridike është kushtetuta e para, e dyta janë marrëveshjet ndërkombëtare, pastaj vijnë ligjet. Dhe marrëveshjet kanë përparësi ndaj ligjeve, por jo edhe ndaj kushtetutës”, deklaroi Bajrami.
Sipas profesoirit Bajrami, në qoftë se Qeveria Kurti mendon se ka qenë gabim ajo duhet të procedojë legalisht me instrumente ligjore-shtetërore, jo me fjalime politike.
“Duhet të hynë në rend dite ajo çështje dhe duhet të provojë ta shfuqizojë. Nuk i duhet 2/3 e pakicës, por 82 vota me të njëjtën shumicë që edhe është votuar”, u shpreh Bajrami.
Sipas tij, nuk nevojitet votimi i dyfishtë, për asnjë prej marrëveshjeve ndërkombëtare.
