Mjeku kujdestar në Qendrën Emergjente në QKUK, Avdush Bajgora, ka thënë se dy nga pacientët e dërguar nga aksidenti me gjashtë të lënduar në Prishtinë, janë në gjendje të rënduar.
Ai në një prononcim për Tëvë 1, ka thënë se njëri nga ta është në gjendje më të rëndë dhe se pritet që të dërgohet në mjekim intensiv.
“Në Qendrën Emergjente janë sjellë gjashtë pacientë pas një fatkeqësie në trafik, e cila ka ndodhur këtu në Prishtinë. Prej këtyre pacientëve, dy nga ta janë në gjendje të rënduar…ndërsa njëri ka gjendjen e rëndë, ka gjakderdhje epidurale, ka fraktura, thyerje të sinusit etmoid….është në gjendje pra të rënduar, i kyçur në aparat për asistencë të respiratorëve, sipas të gjitha gjasave do të dërgohet në mjekim intensiv.i kyçur në aparat për asistencë të respiratorëve. Kurse pesë janë me lëndime, por gjendje e tyre është stabile”, ka deklaruar ai.
Bajgora shtoi se ende janë duke u realizuar ekzaminime shtesë.
Ndryshe, zëdhënësja e Policisë për Rajonin e Prishtinës, Flora Ahmeti ka thënë për teve1.info se në këta aksident janë përfshirë dy vetura, derisa si pasojë janë lënduar gjashtë persona.
“Sot rreth orës 09:00 kemi pranuar informatën se në udhëkryqin afër konvikteve në Prishtinë , ka ndodhur një aksident trafiku. Në këtë aksident kanë qenë të përfshira, dy automjete të cilat kanë qenë në lëvizje. Si pasojë e aksidentit lëndime trupore kanë pësuar gjashtë persona. Me rastin po merret hetuesia nga njësiti i trafikut rrugor”, tha ajo./teve1.info./
