Talenti më i ri i Italisë së Roberto Mancinit, Vilfrid Gnjonto, dje luajti ndeshjen e tij të parë si titullar me kampionët e Europës në fuqi, por ai gol i parë prej tij nuk erdhi, ndonëse nuk zhgënjeu aspak, përkundrazi e luajti të gjithë ndeshjen kundër Hungarisë dhe tani pret që të ketë hapësirë edhe ndaj Anglisë të shtunën, por edhe në atë ndaj Gjermanisë, në fillim të javës së ardhshme.
Gjithsesi, teksa po përjeton ëndrrën e përfaqësueses A, edhe pse vetëm 18- vjeçar, Vilfrid ka edhe një tjetër, të cilën e zbulon babai i tij, Boris Noel Gnjonto:
“Djali im është interist dhe ëndrra e tij është të kthehet te zikaltrit. Kur u largua 2 vite më parë i ardhi shumë keq, por mendoj se ajo sakrificë ia vlejti, duke parë se në këto pak ditë të funditka ndryshuar jeta e tij dhe e jona.
Pa dyshim që si prindër diçka e tillë na gëzon pa masë, por pres nga Vilfrid që të vazhdojë të studiojë. Madje, pas debutimit me asist më mori ne telefon dhe më tha:
‘Babi, mi sill në Koverçano librat, pasi besoj se do të qëndroj edhe disa ditë të tjera’”, zbuloi i ati i talentit italian.
