Politologu, Dorajet Imeri ka komentuar situatën rreth zgjedhjes së presidentit të Kosovës, duke theksuar se insistimi i LVV-së për rinominimin e Vjosa Osmanit si presidente mund të përballet me një bllokadë totale nga LDK dhe PDK, që do ta bëjë të pamundur rizgjedhjen e saj.
Sipas Imerit, PDK nuk është e interesuar për një marrëveshje klasike, siç ka kërkuar LDK, por preferon një marrëveshje gjithëpërfshirëse.
“Insistimi i LVV-së për të rinominuar Osmanin për të qenë ajo presidente e vendit, do të mund të haste në një bllokad totale nga partitë e tjera politike nga LDK dhe nga PDK, të cilat do ta pamundësonin rizgjedhjen e Osmanit. Kompensimin që e kanë kërkuar nga Kurti, LDK të cilët kanë kërkuar një marrëveshje politike klasike. Është një marrëveshje klasike politike me PDK-në të cilën sot shefi i grupit parlamentar të PDK-së, Arian Tahiri i cili tha se ne nuk duam një marrëveshje të tillë, por duan një marrëveshje gjithëpërfshirëse të cilën emri do të ishte konsensual sa i takon zgjedhjes së presidentit të vendit”, ka deklaruar Imeri në emisionin “Ditari” në Tëvë1.
Ndërkohë, ish-ministri i Arsimit, Arsim Bajrami, ka shprehur gatishmërinë për të kandiduar si president konsensual.
Imeri ka komentuar këtë vetë propozim të Bajramit, duke sugjeruar se ai mund të mos ketë pasur përkrahjen e PDK-së ose se nuk ka komunikuar ende me ta.
Ai tha se Bajrami ka provojë të madhe dhe nuk ka asnjë dilemë në kuptimin e njohjes së sistemit për president.
“Bajrami ka provojë shumë të madhe dhe nuk kam asnjë dilemë në kuptimin e njohjes së sistemit për president, por fakti që është vetë propozuar, unë supozoj se nuk e ka pasur përkrahjen e PDK-së ose së paku nuk ka komunikuar me ta. Prandaj nëse ka konsensus mund të bëhet, nëse s’ka duhet të kuptojmë sepse ndoshta do të ketë emra të tjerë të cilët do të mund të vendosen në diskutim, prandaj jam subjektiv në këtë aspekt”, ka thënë ai në fund./teve1.info/
