Përmes një njoftimi për media, AVONET u ka bërë thirrje institucioneve që të shtojnë kujdes të veçantë në mbikëqyrjen e ngritjes së cilësisë së punimeve të infrastrukturës rrugore.
“AVONET, shpreh shqetësimin e thellë lidhur me gjendjen e infrastrukturës rrugore e cila është rënduar anembanë vendit dhe po rëndohet edhe më tej si rezultat i punimeve jocilësore dhe mirëmbajtjes jo të duhur. Qytetarët përmes taksës rrugore gjatë regjistrimit të automjetet paguajnë dhe kjo për shumë qytetarë përveç ngarkesës financiare nuk po i sjell siguri dhe komoditet gjatë pjesëmarrjes në komunikacion. Duke qenë vlerësim i pjesës dërmuese se përmirësimi i infrastrukturës rrugore është parakusht i zhvillimit ekonomik, i bëjmë thirrje të gjitha institucioneve të shtojnë kujdes të veçantë në mbikëqyrje n e ngritjes së cilësisë së punimeve të infrastrukturës rrugore si dhe mirëmbajtjes së rrugëve”, thuhet në njoftim.
Sipas reagimit të AVONET, ekzekutimi i punimeve në infrastrukturë rrugore është shumë i dobët dhe jocilësor.
Nga AVONET kanë kërkuar nga Ministria e Mjedisit që sa më parë të themelojë një komision për vlerësimin e gjendjes së rrugëve.
“Është pajtueshmëri e përgjithshme se në Republikën e Kosovës, ekzekutimi i punimeve në infrastrukturë rrugore është shumë i dobët dhe jocilësor dhe si rezultat kemi dëmtime të shpejta të rrugëve të cilat për tu sanuar le vetëm që e rëndojnë buxhetin e Republikës së Kosovës, por paraqesin edhe rrezik të madh në komunikacion. Kërkojmë nga Ministria e Mjedisit, Planifikimit Hapësinor dhe Infrastrukturës që sa më parë të themelojë një komision dhe të bëjë vlerësimin e gjendjes së rrugëve, Komision ky i cili në përbërje duhet të ketë profesionistë të fushës dhe përfaqësues nga shoqëria civile”, thuhet më tej në reagim. /teve1.info/
