Avokati i Popullit ka organizuar një takim të martën me partnerët ndërkombëtarë për nder të përvjetorit të 25-të të themelimit të këtij institucioni.
Avokati i Popullit, Naim Qelaj, para diplomatëve të huaj shprehu nevojën që partneriteti me aleatët të fuqizohet dhe të vazhdojë edhe më tej në drejtim të respektimit të të drejtave të njeriut.
“Besoj që kjo mbështetje dhe ky bashkëpunim dhe partneritet do të vazhdojë edhe më tej. Jam i bindur se është në interes të të gjithëve neve që vendi ynë këtë partneritet ta ruajë dhe fuqizojë në drejtim të avancimit edhe më tej të respektimit të të drejtave të njeriut”, theksoi ai.
Ai përmendi edhe sfidat që kohëve të fundit janë përballuar, ndër të tjera edhe me mungesën e konstituimit të Kuvendit të Kosovës.
Ndërkaq, nënvizoi se gjatë periudhës sa po ushtron detyrën e Avokatit të Popullit, ka pasur një tendencë që të goditen institucionet e pavarura, por nuk tregoi se nga kush.
“Së fundmi, sfidën më të madhe e kemi mungesën e vullnetit politik për konstituimin e Kuvendit të Kosovës dhe formimin e qeverisë dhe institucioneve të tjera që funksionojnë pas zgjedhjeve. Këto vite, për sa vite unë jam Avokat i Popullit, kam parë një tendencë që vazhdimisht, në situata të kësaj natyre, të goditen institucionet e pavarura dhe të jenë nën kërcënim në forma të ndryshme. Qoftë përmes deklarimeve publike, qoftë përmes anashkalimit dhe injorimit të qëndrimeve që i kryen Avokati i Popullit”, shtoi Qelaj.
Pjesë e kësaj tryeze ishte edhe shefi i Zyrës së Bashkimit Evropian në Kosovë, Aivo Orav, i cili tha se institucioni i Avokatit të Popullit shënon arritje të mëdha në drejtim të respektimit të të drejtave të njeriut dhe barazinë në Kosovë.
Ai theksoi se ruajtja e pavarësisë së institucionit të Avokatit të Popullit do të thotë rritje e besimit të publikut.
“Ky përvjetor shënon arritje të mëdha që reflektojnë vite pune, të dedikimit dhe profesionalizmit me qëllim të promovimit të një shoqërie që vlerëson të drejtat e njeriut dhe barazinë për të gjithë qytetarët e Kosovës… BE-ja i thekson jashtëzakonisht shumë të drejtat dhe liritë e njeriut, duke kuptuar rolin qenësor të institucionit të Avokatit të Popullit në mbrojtjen dhe promovimin e të drejtave dhe lirive. Ruajtja e pavarësisë së institucionit të Avokatit të Popullit do të thotë rritje e besimit publik”, theksoi Orav.
Pjesë e takimit ishin edhe përfaqësues të ambasadave të tjera të akredituara në Kosovë, si dhe shefi i EULEX-it, Pietro Barbano.
