Ngjitjen në ashensor nuk po e shfrytëzojnë minatorët, pasi ata janë ngujuar në horizontin e dhjetë të minierës që nga dita e martë.
Mirëpo, në të po hynë e po dalin vizitorë të shumtë.
Gjatë së enjtes, në mesin e tyre ishte edhe Avokati i Popullit, Naim Çelaj. Ai tregoi qëllimin e vizitës së sotme në Minierën e Trepçës.
Aty ku minatorët po mbanin grevë, bashkë me Avokatin e Popullit e kryesindikalistin, Ibrahim Jonuzi, erdhi edhe një ekip emergjent.
Para tyre, minatorët shprehën shqetësimet që kanë.
“Qitu jena ardhë me zor, për keqmenaxhim, na nuk tërhiqum, na jem të bijtë e minatorëve, që janë kanë e kanë dridh themelet e Jugosllavisë, nuk mundet me na frikësua askush. Na jem ndalë veç për idare tona”, tha minatori, Mehdi Ahmeti.
Minatorët madje e pyetën Çelajn për ligjshmërinë e grevës.
“A ka mundësi me na tregu për grevën tonë a është e ligjshme a e paligjshme?”, pyeti minatori, Ali Peci.
“Aktivitetet sindikale janë të drejta të garantime me kushtetutë…nuk ka asnjë institucion që e ndalon”, u përgjigj Çelaj.
Minatorët, gjatë së enjtes u vizituan edhe nga Sindikata e Shqipërisë e Sindikata e Pavarur e Sektorit Privat e Kosovës.
