Gent Gjini, avokati i një komisionereje të Lëvizjes Vetëvendosje, e cila është arrestuar nën dyshimin për manipulim të votave, ka deklaruar se klientja e tij ka nënshkruar një dokument pa e ditur përmbajtjen e tij.
Në emisionin “Mesditë” në Televizionin Tëvë1, Gjini ka theksuar se komisionerja ka vepruar me besimin se procesi i numërimit të votave ishte zhvilluar në mënyrë të rregullt, ashtu si në herët e kaluara.
“Kandidatja, komisionerja nga Lëvizja Vetëvendosje të cilën e përfaqësoj unë, në fund thjesht ka nënshkruar dokumentin sepse ka menduar se procesi ka shkuar në mënyrë të rregullt. Nuk e amnistoj askënd, veprimet e hetuesve dhe policisë janë të përshëndetshme, por duhet të ndahet shapi nga sheqeri,” ka deklaruar Gjini.
Ai ka shtuar se, sipas klientes së tij, nuk ishte hera e parë që merrte pjesë në numërimin e votave dhe se në proceset e mëparshme nuk kishte pasur probleme.
“Ajo ka shkuar me idenë se nuk ekzistojnë më raste të manipulimit të votave si më parë, dhe vetëm pas dy javësh ka kuptuar që ka ndodhur vjedhje e votave,” ka thënë Gjini.
Avokati gjithashtu ka komentuar për rolin e komisionerëve dhe vëzhguesve, duke theksuar se disa mungesa njohurie dhe pak mendjelehtësi janë shfaqur, por sipas tij, keqpërdorimi më i madh ka ndodhur përmes përdorimit të kompjuterëve.
“Shpërputhja më e madhe dhe keqpërdorimi më i madh, sipas meje, ka ndodhur me kompjuter. Aty dyshoj se është bërë manipulimi i madh,” ka shtuar Gjini.
Ndryshe, më shumë se 100 zyrtarë të angazhuar nga komisioni Qendror i Zgjedhjeve (KQZ) janë ftuar për intervistim nga organet e drejtësisë nën dyshimin për manipulim me vota në Prizren në zgjedhjet e 28 dhjetorit.
Policia e Kosovës ka konfirmuar se në bashkëpunim me Prokurorinë Themelore në Prizren është duke zhvilluar një operacion në rajonin e Prizrenit lidhur me dyshimet për keqpërdorim të votave./teve1.info/
