Avokati Arianit Koci ka njoftuar se sot do të vazhdojë protestën e tij simbolike para Kuvendit të Kosovës, në shenjë reagimi ndaj bllokadës institucionale që ka përfshirë vendin.
Përmes një postimi në rrjetet sociale, Koci tha se protesta është e qetë dhe paqësore, por bart një mesazh të qartë për klasën politike dhe institucionet e vendit.
“Sot protestoj. Para Kuvendit. Do ta kam edhe një mbështetje të fuqishme… nga aleatët e veçantë. Do të ketë edhe media vendore dhe ndërkombëtare. Shteti është në bllokadë. Populli – në pritje. Milionat po humben. Askush nuk lëviz, askush nuk jep përgjegjësi,” ka shkruar Koci.
Ai theksoi se përmes kësaj proteste po kundërshton apatinë dhe mungesën e llogaridhënies nga institucionet, duke shtuar:
“Protesta ime është simbolike, e qetë dhe paqësore – por mesazhi është real: Nuk mund të na shndërrojnë në turmë të heshtur.”
Protesta vjen në një kohë kur Kuvendi i Kosovës po përballet me një bllokadë të zgjatur për shkak të mungesës së konsensusit për zgjedhjen e kryetarit të Kuvendit, duke penguar konstituimin e plotë të institucioneve të reja.
