Agjencia e Ushqimit dhe Veterinarisë (AUV) ka njoftuar se qumështi për foshnja Aptamil AR 1 është i sigurt për përdorim dhe është lejuar sërish për shitje në tregun e Kosovës.
Sipas AUV-së, pas ndalimit të përkohshëm të këtij produkti janë kryer ritestime shtesë laboratorike, të cilat kanë konfirmuar se ai i përmbush të gjitha standardet e sigurisë ushqimore.
Në komunikatën për media thuhet se rezultatet e analizave kanë qenë në përputhje të plotë me kriteret ligjore dhe se nuk është konstatuar asnjë rrezik për shëndetin e konsumatorëve. Si rrjedhojë, masa e ndalimit është hequr dhe produkti mund të qarkullojë normalisht në treg.
AUV ka sqaruar se ndalimi fillestar i qumështit ishte masë parandaluese, e ndërmarrë për mbrojtjen e shëndetit publik, pas një njoftimi nga autoritetet e Bashkimit Evropian lidhur me dyshime për prani të një bakterie në një seri të caktuar të produktit.
Agjencia ka theksuar se vazhdon monitorimin e vazhdueshëm të produkteve ushqimore në treg dhe u bën thirrje qytetarëve që të informohen vetëm nga burime zyrtare.
“Agjencia e Ushqimit dhe Veterinarisë thekson se ndalimi i përkohshëm i këtij produkti ishte masë parandaluese, e ndërmarrë për mbrojtjen e shëndetit publik”, thuhet në njoftim. /teve1.info/
