Mëngjesi i së martës e gjeti hapësirën e kazermës “Adem Jashari” me makineri të rënda.
Aty u vendosën këta autoblindë që janë të prodhimit amerikan. Ngjashëm ndodhi edhe para disa ditësh.
Krejt kjo pasi që Ministria e Mbrojtjes tashmë ka blerë dhjetëra automjete te blinduara të cilët janë prokuruar bazuar në planin e blerjes shtet më shtet me Shtetet e Bashkuara të Amerikës.
Se edhe një kontingjent ka mbërritur të martën në bazën ushtarake të FSK-së, e konfirmoi Liridona Gashi nga Ministria e Mbrojtjes.
“Konfirmojmë se kemi pranuar edhe një kontingjent tjetër të automjeteve të blinduara, prodhim i ShBA”, ka thënë Gashi.
Ish deputeti i LVV-së, Enver Dugolli thotë që kjo marrëveshje bilaterale me ShBA- e cila është në planin gjithëpërfshirës që mundëson furnizimin me pajisje luftarake të mesme dhe të rënda, tregon se ShBA-të mbeten përkrahës të Kosovës.
“Arritja e këtij kontingjenti të mjeteve të blinduara është vetëm një segment i shumë blerjeve, prokurimeve që janë bërë me Shtetet e Bashkuara të Amerikës, prandaj ky fakt duhet të na gëzoi e na gëzon çdo ditë. Nuk qëndrojnë akuzat që ne i kemi prishë marrëdhëniet me Shtetet e Bashkuara të Amerikës, janë pikërisht SHBA-të të cilat janë partneri kryesor i rritjes së kapaciteteve mbrojtëse të Kosovës”, ka thënë Dugolli.
Ai shtoi se FSK do të armatoset edhe më shumë në muajt e ardhshëm.
“Do të arrijnë edhe pjesë të tjera edhe sisteme të tjera të armatimit edhe armatim i sofistikuar i nevojshëm për ngritjen e kapaciteteve për përmbushjen e këtij plani gjithëpërfshirës”, ka shtuar ai tutje.
Edhe njohësi i sigurisë, Nuredin Ibishi vlerëson se këto blerje tregojnë nivelin e lartë të bashkëpunimit me Shtetet e Bashkuara të Amerikës.
“Mendoj se ky i fundit me ASV tregon një nivel të lart bashkëpunimi edhe për disa automjete të cilat akoma janë në ardhje, pritet edhe kontingjenti tjetër. Në një formë, kjo e përkrahë FSK-në, na përkrahin me të gjitha aspektet. Krahas marrëveshjes për ndihmën ushtarako-teknike është parapa edhe në planin afatshkurta edhe afatmesëm të pajisjeve duke filluar nga armatimi i lehtë ushtarak deri te armatimi i rëndë”, ka thënë Ibishi.
Pas përfundimit të ardhjes së kontingjenteve të autoblindave amerikanë, Tëvë1 mëson se do të dalin detaje rreth numrit të tyre dhe blerjeve të armatimit që do të bëhen gjatë muajve në vijim nga ShBA-të.
