Policia e Tiranës, në bashkëpunim me Komisariatin e Policisë Krujë, ka zhvilluar operacionin e koduar “Tracking”, në kuadër të hetimeve për ngjarjen e 11 nëntorit 2025, pranë rrethrrotullimit të Rinasit. Operacioni vijon ende në terren.
Gjatë kontrollit në një banesë në fshatin Zall, Fushë Krujë, uniformat blu zbuluan një arsenal të konsiderueshëm armësh dhe lëndësh plasëse.
Sipas policisë, në ambientet e banesës u sekuestruan:
- 3 kallëpë tritol
- 12 granata dore sulmuese
- Sasi të lëndëve plasëse të gatshme për shpërthim, të montuara me kapsolla, fitil zjarrpërcjellës dhe celularë
- 3 ndezës granatash dhe kapsolla detonatore
- 5 celularë
- 4 armë zjarri (2 automatikë dhe 2 pushkë)
- 8 krehra dhe pjesë armësh
- 6,000 fishekë të kalibrave të ndryshëm
- 2.25 kg cannabis
Pronari i banesës, shtetasi Y. Z., 48 vjeç, është shpallur në kërkim, ndërsa policia vijon operacionet për kapjen e tij. Hetimet po thellohen për të përcaktuar lidhjen e mundshme të të dyshuarit me ngjarjen e Rinasit.
Materialet procedurale janë referuar në Prokurorinë e Tiranës për veprime të mëtejshme, ndërsa operacioni “Tracking” vazhdon në terren.
