Mesfushori i Interit dhe Kombëtares së Shqipërisë, Kristjan Asllani, ka thënë se trajneri Cristian Chivu dhe Simone Inzaghi, nuk dallojnë shumë për nga puna e tyre dhe mënyra si e udhëheqin lojën.
Asllani ka folur pas barazimit 1:1 të Interit ndaj Monterreyt, në ndeshjen e parë të Kupës së Botës për Klube, ku debutimin e bëri edhe trajneri Chivu.
“Patëm disa momente pozitive, por për fat të keq pranuam gol nga ndërprerja. Duhet të përmirësohemi, por kishte gjëra pozitive. Ne donim që ta nisnim garën me pikët e plota, por tani duhet të mendojmë për ndeshjen e radhës”, ka deklaruar Asllani.
Asllani ishte titullar dhe luajti deri në minutën e 68-të në ndeshjen ndaj skuadrës meksikane.
23-vjeçari kishte ndeshje edhe nën drejtimin e trajnerit Inzaghi, ku sezonin që përfundoi pati 36 paraqitje ku realizoi 3 gola dhe bëri 2 asistime.
“Nuk ka shumë dallim mes Chvius dhe Inzaghit. Kemi luajtur me të njëjtin sistem në vitet e fundit. Chivu na ka kërkuar më shumë presion dhe këtë e aplikuam mirë”, deklaroi Asllani.
Ndeshjen e radhës në Botërorin e klubeve, Interi e luan më 21 qershor ndaj Urawa Reds në kuadër të Grupit E, të cilin e përbën edhe River Plate.
