Mbi 2 mijë e 64 kilogramë mish pule të importuar nga Polonia janë asgjësuar të martën nga Agjencia e Ushqimit dhe Veterinarisë pasi në këtë ngarkesë është konstatuar prania e bakterit Salmonella spp.
Sipas njoftimit zyrtar të AUV-së, asgjësimi është kryer pas pranimit të një alarmi nga Komisioni Evropian – Sistemi i Paralajmërimit të Shpejtë për Ushqim (RASFF).
Gjatë kontrollit të realizuar në ngarkesën e produktit MDM pule, me prodhues CEDROB S.A., Ubojnia Drobiu Ujazdówek nga Polonia dhe të importuar nga kompania “KAJMAK SHPK” nga Prizreni, është identifikuar prania e salmonelës.
Pas pranimit të njoftimit nga RASFF dhe me kërkesë të kompanisë importuese, inspektorët e AUV-së kanë kryer kontrolle të detajuara, me ç’rast është konfirmuar prania e bakterit në të gjithë sasinë prej 2064 kilogramësh mish pule.
Menjëherë pas konstatimit të rastit, ngarkesa është asgjësuar në përputhje me procedurat ligjore në fuqi dhe standardet e sigurisë ushqimore, duke parandaluar kështu daljen e saj në treg dhe rrezikimin e shëndetit të konsumatorëve.
Agjencia e Ushqimit dhe Veterinarisë ka bërë të ditur se do të vazhdojë monitorimin me kujdes të shtuar dhe bashkëpunimin e ngushtë me institucionet vendore dhe ndërkombëtare, si dhe me bizneset importuese, me qëllim të identifikimit dhe parandalimit të rasteve të ngjashme, duke garantuar ushqim të sigurt dhe në përputhje me standardet evropiane të sigurisë ushqimore.
