Futbollisti i Kombëtares së Shqipërisë, Jasir Asani do të bëjë hapin e madh në karrierë pas përfundimit të Kampionatit Evropian që po mbahet në Gjermani.
Asani këtë verë do të largohet nga Koreja e Jugut për t’u zhvendosur në futbollin spanjoll. Mësohet se sulmuesi i krahut do të transferohet te skuadra nga La Liga, Las Palmas.
Thuhet se Asani tashmë ka arritur marrëveshjen me ekipin spanjoll, i cili po negocion me jug-koreanët e Gwangju për dëmshpërblimin e 29-vjeçarit.
Asani me Las Palmasin do të firmos kontratë dyvjeçare me opsionin e vazhdimit edhe për vitin e tretë. Ai prej janarit të vitit 2023 bën karrierë në Korenë e Jugut, ndërsa është titullar i padiskutueshëm te Shqipëria në “Euro 2024”.
Në 16 paraqitje për Shqipërinë, Asani ka shënuar 4 gola prejse ka debutuar në fillim të vitit të shkuar.
