Artan Nimani nga Nisma Socialdemokrate në emisionin “Këndi i debatit” në Tëvë1 ka komentuar vendimin e Partisë Demokratike të Kosovës (PDK) për të mos e rikandiduar Ramiz Lladrovcin për kryetar të komunës së Drenasit në zgjedhjet e ardhshme lokale.
Nimani, i cili dikur ishte një zë i fuqishëm brenda PDK-së, ka deklaruar se largimi i tij nga kjo parti ndodhi në vitin 2019, pasi u emërua prorektor në Universitetin e Prizrenit “Ukshin Hoti”.
“5-shja e parë për themelimin e PDK-së kam qenë unë, ose më mirë të them kam qenë deri kur jam zgjedhur prorektor në universitet. Jam detyruar që ta lë PDK-në, pasi nuk kam mundur të vazhdoj më, si pasojë e menaxhimit aktual të PDK-së – ose më mirë të them, klasës së Xhevde Dodës,” u shpreh Nimani.
Ai e cilëson të padrejtë mënyrën se si është lënë jashtë garës Ramiz Lladrovci, duke thënë se ky është një rezultat i ndikimit të lobimit të brendshëm brenda strukturave të PDK-së.
“Në kushte normale, një person që dy herë fiton zgjedhjet duhet të shpallet kampion i transparencës, ofruesi më i madh i barazisë gjinore dhe i kushteve të mira. Nuk duhet të dominohet nga faktorë të jashtëm. Kjo lidhet me dy elemente: njëra është lufta e gjeneratave brenda partisë, dhe tjetra është fuqia e lobimit te strukturat qendrore të PDK-së, për të mbivotuar ose për të mos e votuar një kandidaturë, pavarësisht rezultateve.”, ka thënë Lladrovci
Deklaratat e Nimanit vijnë në një kohë kur PDK-ja ka zgjedhur të mos e rikandidojë Lladrovcin për një mandat tjetër në Drenas, vendim ky që ka nxitur debate të brendshme dhe reagime publike, përfshirë edhe nga ish-anëtarë të saj.
