Edhe tre persona të tjerë janë arrestuar nga Policia e Kosovës, nën dyshimin që të njëjtit janë përfshirë në vrasjen e djeshme në Vushtrri, ku një person mbet i vrarë e dy të tjerë të plagosur.
Numri i të arrestuarve ka shkuar në pesë, shkruan teve1.info
Ndërkohë, me urdhër të prokurorit, të dyshuarve iu është caktuar masa e ndalimit policor prej 48 orëve.
Ndërkaq, trupi i pajetë i viktimës (27-vjeçar) është dërguar në Institutin e Mjekësisë Ligjore (IML).
Policia thotë se lidhur me rastin, hetimet janë duke vazhduar nga Sektori Rajonal i Hetimeve DRP, Mitrovicë e Jugut, si dhe në bashkëpunim me prokurorin.
Vrasja ka ndodhur dje, rreth orës 16:00 në rrugën “Mehmet Konjuhi” në Vushtrri. Pas të shtënave me armë zjarri, njësitë policore kanë arritur në vendin e ngjarjes, ku aty është gjetur personi i vrarë dhe dy të tjerë të plagosur.
Të plagosurit janë dërguar në Spitalin e Vushtrrisë, më pas për trajtim të mëtejshëm janë transferuar në Qendrën Klinike Universitare të Kosovës (QKUK).
