Një 35-vjeçar është arrestuar pasi ka sulmuar zyrtarët policorë gjatë një intervenimi për largimin e një veture të parkuar në mënyrë të kundërligjshme.
Sipas Policisë Rajonale të Ferizajt, rasti ka ndodhur rreth orës 15:40, kur një automjet me targa të huaja ishte parkuar para hyrjes së stacionit policor.
Në njoftim është bërë e ditur se pavarësisht urdhrave të zyrtarëve, drejtuesi i veturës, i identifikuar me inicialet A.N., ka refuzuar bashkëpunimin, duke përdorur gjuhë fyese dhe kërcënuese, si dhe duke shfaqur sjellje agresive.
Gjatë ndërhyrjes policore, i dyshuari ka tentuar t’i sulmojë zyrtarët, çka ka bërë që policia të përdorë sprej mbrojtës për neutralizimin e situatës.
Si pasojë e incidentit, tre zyrtarë policorë dhe vetë i dyshuari kanë pësuar lëndime të lehta.
Rasti është duke u trajtuar nga Njësia Rajonale e Hetimeve, ndërsa me vendim të prokurorit të shtetit, ndaj të dyshuarit është iniciuar procedurë penale për veprën “Sulm ndaj personit zyrtar”. Ai është dërguar në mbajtje për 48 orë.
