Policia e Kosovës ka njoftuar se një person, i cili në qershor të këtij viti kishte deklaruar se disa persona zyrtarë po i kërkonin ryshfet për bartjen e aksioneve në pronësinë e tij, tashmë dyshohet se ka bërë deklarim të rremë.
Sipas Policisë, rasti ishte raportuar nga një mashkull kosovar në cilësinë e ankuesit, i cili kishte pretenduar se kërkesa për ryshfet lidhej me bartjen e aksioneve që ai kishte blerë nga bashkëaksionarët e tij.
“Policia e Kosovës, respektivisht Drejtoria për Hetimin e Krimeve Ekonomike dhe Korrupsionit, në qershor të vitit 2025 nga një person mashkull kosovar në cilësi të ankuesit, kishte pranuar informacion se disa persona zyrtarë janë duke i kërkuar ryshfet me qëllim të bartjes së aksioneve në pronësinë e tij, pasi ky i fundit i kishte blerë nga bashkëaksionarët e tij”, thuhet në njoftimin e Policisë.
Megjithatë, pas veprimeve hetimore të ndërmarra në koordinim me Prokurorinë kompetente, Policia ka bërë të ditur se janë siguruar dëshmi të cilat tregojnë se pretendimet e ankuesit nuk qëndrojnë.
“Lidhur me rastin, Policia e Kosovës, në koordinim dhe me autorizim të prokurorit kompetent, ka ndërmarrë veprime hetimore, gjatë të cilave janë siguruar dëshmi nga të cilat rezulton se personi i lartcekur dyshohet se ka deklaruar rrejshëm”, thuhet më tej në njoftim.
Sipas Policisë, me këto veprime i dyshuari ka konsumuar veprën penale “Deklarimi i rremë nën betim”.
“I dyshuari mashkull kosovar, me datën 22.12.2025, është intervistuar në prezencë të avokatit mbrojtës dhe, pas intervistimit, me aktvendim të prokurorit kompetent, i njëjti është ndaluar për 48 orë”, bën të ditur Policia e Kosovës.
Hetimet lidhur me rastin po vazhdojnë nga organet kompetente.
