Një person është arrestuar mbrëmjen e 22 majit 2026 në fshatin Sojevë të Ferizajt, pasi gjatë një kontrolli policor iu gjet armë zjarri dhe rezultoi se kishte urdhërarrest aktiv.
Sipas njoftimit të Policia e Kosovës, rreth orës 23:25, patrulla e Njësisë Rajonale të Komunikacionit Rrugor në Ferizaj, gjatë realizimit të një pike kontrolli, ka ndaluar për verifikim një veturë të tipit Opel Meriva me targa vendore.
Gjatë kontrollit të pasagjerit, personi me inicialet L.T., 25 vjeç, është konstatuar se kishte urdhërarrest aktiv të lëshuar nga Gjykata Themelore në Ferizaj. Po ashtu, tek ai është gjetur një armë zjarri – pistoletë me pesë fishekë.
Në vendin e ngjarjes kanë dalë edhe njësitë reaguese të policisë, ndërsa i dyshuari është shoqëruar në stacion policor dhe është intervistuar nga hetuesit.
Me vendim të prokurorit të shtetit, është iniciuar rast për veprën penale “Armëmbajtje pa leje”, ndërsa i dyshuari është dërguar në vuajtje të dënimit me burg prej 20 ditësh për veprën penale “Posedim i paautorizuar i narkotikëve, substancave psikotrope ose analoge”.
