Një 26-vjeçar nga Mitrovica është arrestuar të enjten, pasi dyshohet se në bashkëkryerje me persona të tjerë ka kryer veprën penale “vjedhje e rëndë”.
Sipas njoftimit të Policisë, rasti ka ndodhur në një shtëpi në rrugën “Skënderbeu” në Vushtrri, në muajin mars të këtij viti. Dy të dyshuarit e tjerë për këtë rast janë arrestuar më herët, në muajin korrik.
Pas intervistimit dhe procedurave të nevojshme, me aktvendim të prokurorit të rastit, të dyshuarit i është caktuar masa e ndalimit policor prej 48 orësh.
“Sot, me datën 09 Tetor 2025, hetuesit e Sektorit Rajonal të Hetimeve në kuadër të Drejtorisë Rajonale në Mitrovicën e Jugut, kanë identifikuar dhe arrestuar një person të dyshuar për veprën penale “vjedhje e rëndë”. Personi i dyshuar i moshës 26 vjeçare, shtetas i Republikës së Kosovës është arrestuar pas hetimeve të detajuara, provave të siguruara materiale dhe dyshimeve të bazuara se i njëjti kishte kryer veprën penale. Ai dyshohet se në bashkëkryerje me persona të tjerë kanë kryer veprën penale në një shtëpi në rrugën ,,Skënderbeu” në Vushtrri në muajin Mars të këtij viti. Dy persona të dyshuar të involvuar në këtë rast janë arrestuar në muajin korrik, ndërsa i dyshuari i tretë është arrestuar sot nga ana e hetuesve në vendbanimin e tij në një fshat të Vushtrrisë. Pas intervistimit dhe procedurave tjera të nevojshme, me aktvendim të prokurorit të rastit, të dyshuarit i është caktuar masa e ndalimit për 48 orë”, thuhet në njoftim./teve1.info/
