Një 25-vjeçar me inicialet M.P. është arrestuar të hënën në Mitrovicën e Veriut, nën dyshimin se ka dëmtuar dy automjete duke i goditur me gurë. Ndaj tij ishte gjithashtu aktiv një urdhërarrest i lëshuar nga gjykata për veprën penale “Kanosje”.
Sipas Policisë së Kosovës, i dyshuari lidhet me dy raste të iniciuara në Stacionin Policor në Mitrovicën e Veriut, që kanë të bëjnë me veprën penale “Dëmtim apo asgjësim i pronës”.
“Me datë 20.07.2026, policia në veri ka arrestuar personin e dyshuar me inicialet M.P. (2001), i cili dyshohet se më 10.07.2026 ishte i përfshirë në dy raste të iniciuara në stacionin policor Mitrovicë e Veriut për veprën penale ‘Dëmtim apo asgjësim i pronës’. Bazuar në hetimet e zhvilluara, i njëjti dyshohet se ka dëmtuar dy automjete duke i goditur me gurë”, thuhet në njoftimin e Policisë.
Policia njoftoi se i dyshuari kishte arritur t’i shmangej arrestimit më 14 korrik, por pas lokalizimit të tij në Mitrovicën e Veriut është arrestuar, ndonëse ka tentuar sërish të largohet.
“Gjatë arrestimit, i dyshuari ka tentuar sërish t’i shmangej arrestimit, por zyrtarët policorë kanë arritur ta neutralizonin dhe arrestonin”, bëri të ditur Policia.
Sipas autoriteteve, gjatë intervistimit në prani të avokatit mbrojtës, M.P. e ka pranuar se kishte dëmtuar automjetet.
Policia gjithashtu bëri të ditur se ndaj tij ishte në fuqi një urdhërarrest i lëshuar nga gjykata për veprën penale “Kanosje”.
Përveç këtij rasti, ai figuron si i dyshuar edhe në 10 raste të tjera penale, të cilat janë në procedurë pranë organeve të drejtësisë.
“Po ashtu, në sistemin policor ai figuron si i dyshuar edhe në 10 raste të tjera penale, përfshirë veprat: ‘Vrasje’, ‘Nxitje e urrejtjes dhe mosdurimit’, ‘Sulm ndaj personit zyrtar’ dhe ‘Mbajtje në pronësi, kontroll ose posedim të paautorizuar të armëve’, të cilat janë në procedurë pranë organeve të drejtësisë”, thuhet në njoftimin e Policisë.
Me urdhër të prokurorit të shtetit, ndaj të dyshuarit është caktuar masa e ndalimit prej 48 orësh.
Policia e Kosovës theksoi se mbetet e përkushtuar në identifikimin dhe arrestimin e personave që kryejnë vepra penale, si dhe në sjelljen e tyre para organeve të drejtësisë.
