Pjesëtarët e Ministrisë së Punëve të Brendshme të entitetit të Bosnjë e Hercegovinës, Republika Sërpska (RS), po zhvillojnë aksionin me emrin e koduar “Blok”, në kuadër të të cilit është privuar nga liria edhe kryetari i Komunës së Tesliqit dhe lideri i Partisë Demokratike Serbe (SDS), Milan Miliçeviq.
“Pjesëtarët e MPB-së së RS po zbatojnë një aksion operativ me emrin ‘Blok’, në kuadër të të cilit janë privuar nga liria personat M.M, M.D. dhe M.J., të gjithë nga Tesliqi, për shkak të dyshimeve të bazuara se kanë kryer veprat penale të tregtisë me ndikim dhe marrjes së ryshfetit”, thuhet në njoftimin e MPB-së.
Mediet lokale raportuan se mes të arrestuarve është edhe kryetari i Tesliqit dhe kryetari i SDS-së, Milan Miliçeviq.
“Gjatë hetimeve, në gjashtë muajt e fundit, në bazë të urdhrit të Gjykatës kompetente, policia ka konfiskuar para që dyshohet se rrjedhin nga veprimtari korruptive të personave të përmendur, dhe ato janë depozituar në depozitën gjyqësore,” bëri të ditur MPB-ja, raporton trt global.
Po kryhen kontrolle në lokacionet e përdorura nga të arrestuarit dhe është në kërkim edhe një shumë parash, që gjithashtu dyshohet të jetë fituar nga veprime korruptive. Ata dyshohen se përmes ndikimit të paligjshëm kanë ndryshuar shumicën në Kuvendin e Komunës së Tesliqit.
