Kryetari i Partisë Demokratike të Kosovës, Memli Krasniqi, ka zhvilluar sot një takim me emisarin francez për Ballkanin Perëndimor, Rene Troccaz.
Në një postim në Facebook, Krasniqi ka shprehur falënderimin për vëmendjen që Franca i kushton Kosovës dhe rajonit në këtë periudhë sfidash globale.
“Sot, pata kënaqësinë të pres në takim emisarin francez për Ballkanin Perëndimor, Rene Troccaz. E falënderova për vëmendjen që Franca i kushton Kosovës dhe rajonit tonë, sidomos në këto kohë sfidash globale,” ka shkruar ai.
Kryetari i PDK-së ka theksuar se rruga më e drejtë dhe më e shpejtë për mbylljen e kapitullit të Ballkanit Perëndimor është integrimi i shpejtë i vendeve të rajonit në Bashkimin Evropian.
“E ritheksova se rruga më e drejtë dhe më e shpejtë për të mbyllur kapitullin e Ballkanit Perëndimor është integrimi sa më i shpejtë i vendeve tona në Bashkimin Evropian,” tha Krasniqi.
Ai ka folur gjithashtu për rëndësinë e institucioneve funksionale dhe dialogut konstruktiv në Kosovë, duke njoftuar Troccazin për kontributin e PDK-së në procesin e votimit të kryetarit të Kuvendit për zhbllokimin e situatës politike.
“Në këtë drejtim, e njoftova emisarin Troccaz që si PDK, ne kemi dhënë kontributin tonë, si përgjegjësi politike, por edhe si vetëdije institucionale, duke votuar kryetarin e Kuvendit në funksion të zhbllokimit të situatës,” tha Krasniqi.
Ai gjithashtu falënderoi ambasadorin francez Guerot dhe të gjithë zyrtarët francezë në Kosovë për mbështetjen e vazhdueshme ndaj shtetit tonë.
“PDK mbetet e përkushtuar për stabilitet, përgjegjësi institucionale dhe të ardhmen evropiane të Kosovës,” përfundoi Krasniqi.
