Asociacioni i Gazetarëve të Kosovës ka njoftuar se është arrestuar dhe shoqëruar në polici kameramani i medias “Betimi për Drejtësi”, Arianit Tahiri.
Sipas AGK-së, Tahiri ka qenë i shoqëruar bashkë me gazetaren, Alberta Hashani e cila ka qenë duke realizuar një hulumtim për dyshimet për keqpërdorim të detyrës gjatë orarit zyrtar të disa prokurorëve në Prizren.
“Tahiri ka qenë duke xhiruar në një lokal publik kur i është ndaluar xhirimi nga punëtorët e lokalit dhe së paku një prokuror që ka qenë aty. Prokurori ka ftuar policinë në lokal dhe derisa ka arritur policia, kameramani Tahiri është mbajtur dhunshëm në lokal nga punëtorët, duke ia privuar lirinë kundërligjshëm. Pas arritjes së Policisë në lokal, zyrtarët policorë ia kanë konfiskuar kameramanit edhe telefonin si mjet i punës, gjë që ndalohet me ligj, dhe e kanë shoqëruar në Stacionin Policor në Prizren për deklaratë”, thuhet në njoftimin e AGK-së.
AGK-ja ka dënuar fuqishëm sjelljen e Policisë, si dhe ka kërkuar lirimin e menjëhershëm të kameramanit, po ashtu lirimin e mjeteve të punës si dhe dhënien e sqarimeve publikisht për incidentin./teve1.info/